Уйғурчә Муқәддәс Китап җәмийити

Юһанна язған иккинчи хәт

¹Худа тәрипидин талланған ханимға^* вә униң пәрзәнтлиригә мәнки мәсиһийләр җамаитиниң йетәкчисидин салам! Мән чин көңлүмдин силәрни сөйимән. Силәрни ялғуз мәнла әмәс, Худаниң һәқиқитини тонуп йәткәнләрниң һәммиси силәрни сөйиду. ²Чүнки бу һәқиқәт қәлбимиздә яшимақта вә мәңгү бизгә яр болиду. ³Асмандики Атимиз вә Униң Оғли Әйса Мәсиһ һәқиқәт вә меһир-муһәббәт ичидә яшай­диған бизләргә меһир-шәпқәт, рәһимдиллик вә аманлиқ ата қилғай!

Һәқиқәт вә меһир-муһәббәт

⁴Пәрзәнтлириңиздин бәзилириниң асмандики Атимиздин алған әмир бойичә һәқиқәт йолида маңғанлиғини көрүп, интайин хурсән болдум. ⁵Һөрмәтлик ханим, әнди мән сиздин шуни өтүнимәнки, биз һәммимиз бир-биримизгә меһир-муһәббәт көрситишимиз керәк. Мән сизгә йезиватқанлирим йеңи бир әмир әмәс, бәлки биз бурундин тартип қобул қилип келиватқан әмирдур. ⁶Меһир-муһәббәт Худаниң әмирлиригә әмәл қилип яшаш демәктур. Худаниң әмри болса, силәр бурундин тартип аңлап келиватқандәк меһир-муһәббәт йолида меңиштур.

⁷Нурғун сахта тәлим бәргүчиләр дунияниң һәммә җайлирида пәйда болди. Улар Әйса Мәсиһниң дунияға инсан тенидә кәлгәнлигини етирап қилмайду. Бундақлар дәл алдамчи вә Әйса Мәсиһниң дүшми­нидур. ⁸Худа йолида сиңдүргән әҗриңларни йоқитип қоймай, Худа­ниң толуқ мукапитиға егә болушуңлар үчүн өзәңларға агаһ болуңлар. ⁹Әйса Мәсиһниң тәлимлиридә чиң турмай, униңдин чәтнигәнләр Худа Атиға бағланмиған болиду. Әйса Мәсиһниң тәлимлиридә чиң турғанлар болса асмандики Атимиз вә Униң Оғлиға бағлинип яшава­тиду. ¹⁰Әгәр бирәр киши силәрниң җамаитиңларға Әйса Мәсиһниң тәлимлирини әмәс, бәлки башқичә тәлим елип кәлгән болса, уни өйүңларға тәклип қилмаңлар һәм уни қарши алмаңлар. ¹¹Чүнки ундақ адәмни қарши алған киши униң яман ишлириға шерик болғучидур.

Ахирқи сөз

¹²Силәргә дәйдиған йәнә көп сөзлирим бар еди, лекин қәғәз билән сияни ишләткәндин көрә, хошаллиғимизниң толуп тешиши үчүн йениңларға берип дидар көрүшүп сөзлишишни әвзәл көрдүм. ¹³Худа тәрипидин талланған һәдиңизниң пәрзәнтлиридин^* сизгә салам!